Улон

      Улон туж тунсыко мар ке. Мынам улон сярысь малпанэ, вакчияк вераса, мур малпаськыса, таӵе: ӧвӧл дунне вылын умоез но аламаез. Вселеннаялы одӥг кадь, умой кариськод-а тон, яке аламазэ мар ке лэсьтӥськод-а, Со сое уг вала. Мар со умой, мар со алама, ваньзэ сое адями малпаз, ваньмыз со адями пушкын гинэ. Озьы малпаса,
мӧзмыт ик луэ. Тросэз адямиос уг валало, кадь, сое мыным потэ, соос асьсэлэн проблемаоссазы выемын, соин уг адӟо мар соосты котыртэ, уг быгато паськыт малпаськыны. Нош мар соку вань дунне вылын, умоез но аламаез но ӧвӧл ке отын? Мар понна улыны кулэ? Малпасько, со понна ик улӥськом, та юанлы валэктон утчан понна.
    Вань умой тодмо пословица: "Всё, что ни делается - всё к лучшему", яке одӥг киноысь таӵе фраза кылӥ вал: "Ты можешь сделать хорошо, ты можешь сделать плохо, но самое ужасное, что ты можешь сделать, это ничего не сделать". Мон оскисько Ньютонлэн куинетӥ законэзлы, но сое кӧня ке мукет сямен вераса: F = -F, яке мар тон кариськод - со ваньмыз ас вылад берытске, ваньмыз дунне вылын ог-огеныз герӟаськемын. Мукет сямен вераса, Вселенная ваньзэ одӥг "балансэ" пыртыны турттэ.

      Пичи дыръям весяк паймисько вал: малы адямиос ог-огзы вискын керето, малы ог-огзэс уг ярато? Анае (мон озьы мемейме, бабушкаме шуисько вал) весь вера вал мыным: "Алама адямиос ӧвӧл, ваньмыз адямиос умоесь. Ноку но адямиос сярысь аламазэ эн вера но эн малпа". Нош пичи муртлы мар верало, ваньмыз со йыраз кыле. Та нуналлы мон со малпанэн ик улыны турттӥсько.
      Ог-огдэс яратыса улэ! Тау.